+976 7011 9400 info@ttt.mn

  Эрхэм хүндэт хувьцаа эзэмшигчид, Төлөөлөн удирдах зөвлөлийн гишүүд, хамтран ажиллагч байгууллага, хамт олон  болон сайжруулсан шахмал түлш хэрэглэгч нийслэлийн иргэд та бүхний амар амгаланг эрэн мэндчилье.

“Таван толгой түлш” ХХК нь Монгол улсын Засгийн газраас оноосон үүрэг даалгавар, эрхэм хүндэт хувьцаа эзэмшигчдийнхээ итгэлийг эрхэмлэн, хууль журмыг дээдлэн “Агаарын бохирдлын эсрэг хүчээ нэгтгэе” уриатайгаар үйлдвэрлэл, тээвэрлэлт, борлуулалт гэсэн үндсэн 3 чиглэлээр үйл ажиллагаагаа амжилттай удирдан зохион байгуулж, 2019-2020 оны хүйтний улиралд нийслэлийн агаарын бохирдлыг 50 гаруй хувиар бууруулж чадсаныг эн тэргүүнд бахархан тэмдэглэж байна.

Бид чадсан… Зөв шийдвэр, зөв удирдлага, зөв зохион байгуулалт, зөв хөрөнгө оруулалт, зөв дэмжлэгийн үр дүнд нийслэлийн утааг ийнхүү багасган том амжилт, үр дүнг үзүүллээ.

Монгол улсын Засгийн газрын шийдвэрээр “Таван толгой түлш” ХХК-ийг 2018 онд үүсгэн байгуулснаас эдүгээ хүртэл манай хамт олны хувьд онцгой идэвхи зүтгэл, эр зориг, тэсвэр хатуужил, ур ухаан, бүтээлч сэтгэлгээгээ дайчлан өдөр шөнө тасралтгүй, шаргуу хөдөлмөрлөсөн нөр их бүтээн байгуулалтын үе байлаа.

Бид сайжруулсан шахмал түлшний Баруун болон Зүүн бүсийн үйлдвэрийг шат дараалан ашиглалтад оруулж, бүтээгдэхүүн үйлдвэрлэлийн стандарт, чанарын шаардлагыг бүрэн хангаж,  тээвэр-ложистикийн болон борлуулалт-маркетингийн оновчтой удирдлага, зохион байгуулалтыг хэрэгжүүлж ирсний үр дүнд өнгөрөгч 2019-2021 онд Нийслэлийн гэр хорооллын айл өрх болон аж ахуйн нэгжүүдэд сайжруулсан шахмал түлшийг бүрэн нийлүүлж, түлшний хэрэглээг нэвтрүүлж, хүйтний улирлыг утаа багатай, дулаан, тухтай давах нөхцөлийг бүрдүүлж, утаанаас үүдэлтэй олон сөрөг нөлөөллийг тодорхой хэмжээгээр багасгаж чадсан.

Тус компанийн үйл ажиллагаанд Монгол улсын Засгийн газар, компанийн төрийн өмчийн хувьцаа эзэмшигчийн эрхийг хэрэгжүүлэгчид, Нийслэлийн Засаг даргын Тамгын газар онцгой ач холбогдол өгөн хүчээ нэгтгэж, аливаа асуудлыг шуурхай шийдвэрлэн удирдлага зохион байгуулалтын шуурхай дэмжлэг үзүүлж ирсэн.

Энэхүү их бүтээн байгуулалтын ажлыг бүрэн хэмжээгээр хөрөнгө оруулалтыг шийдвэрлэн, санхүүжүүлж ирсэн “Эрдэнэс Тавантолгой” ХК болон сайжруулсан шахмал түлшний үндсэн түүхий эд /мидлинг/-ийг үнэ төлбөргүйгээр нийлүүлэгч “Энержи Ресурс” ХХК-ийн удирдлага, хамт олны итгэл зүтгэл, тусламж дэмжлэг бидний амжилтын бодит суурь болсныг онцгойлон дурдаж,  гүн талархал илэрхийлж байна.

Бидэнтэй хүчээ нэгтгэн, мөр зэрэгцэн хамтарч ажилласан байгууллагууд, түүхий эд болон бэлэн бүтээгдэхүүний тээвэрлэлтийг гэрээлэн гүйцэтгэсэн ачаа тээврийн компани, иргэд,  гэрээт борлуулагчид, харуул хамгаалалтын байгууллага, үйлчилгээний ажилчид та бүхний мэргэжлийн өндөр ур чадвар, хичээнгүй хөдөлмөр зүтгэл нийслэлийн утааг бууруулахад үнэтэй хувь нэмэр оруулсан билээ.

“Таван толгой түлш” ХХК нь богино хугацаанд удирдлага, зохион байгуулалт, бүтцийн хувьд төлөвшиж, үйл ажиллагаа жигдэрч, үнэ цэнэ бүхий хүний нөөцийг бүрдүүлэхийн зэрэгцээ амжилт, ололт, алдаа дутагдлаа нэгтгэн дүгнэж, сургамж аван, туршлага хуримтлуулж ирлээ.

Манай хамт олон нийслэлийн утааг бодитойгоор бууруулсан амжилтандаа урамшин, компанийнхаа хөгжлийн стратегийг 2030 он хүртэл тодорхойлж, олон улсын стандартад нийцсэн “Сайн түлш”-ээр нийслэл болон хүн ам төвлөрсөн, утаа нүүрлэсэн хот сууринг бүрэн хангах зорилго дэвшүүлэн, хэрэгжилтийг нь үе шаттайгаар төлөвлөж, хөтөлбөрийг боловсруулан ажиллаж байна.

Эдүгээ бид төр засгаас хүлээлгэж буй өндөр итгэл, шинэ үүрэг даалгаврыг биелүүлэхийн төлөө, эх орныхоо хөгжил цэцэглэлтэд үнэтэй хувь нэмрээ өргөхийн төлөө нийгмийн хариуцлагаа хэрэгжүүлэн, урам зоригтойгоор урагшилж байна.

 Утаагүй Улаанбаатарын төлөө хүчээ нэгтгэж, Эрүүл агаартай эх орны төлөө хамтдаа урагшилъя.

ГҮЙЦЭТГЭХ ЗАХИРАЛ       М.ГАНБААТАР

Хуваалцах: