Сайн байцгаана уу. Улаанбаатар хотын нийт оршин суугчдынхаа амар мэндийг асуун мэндчилье. 

“Тавантолгой түлш” ХХК байгуулагдаад таван жилийн хугацаа өнгөрч байна. Нийслэл хотод түүхий нүүрсний хэрэглээг хориглох зоримог шийдвэрийг  2018 онд Засгийн газар гаргаж сайжруулсан шахмал түлш үйлдвэрлэх зорилгоор манай компанийг байгуулж байлаа. 

Агаарын бохирдлыг бууруулах том зорилгын эхний алхам, богино хугацааны зорилт нь сайжруулсан шахмал түлшээр нийслэлийн хэрэгцээг бүрэн хангах явдал байсан.  

Өнгөрсөн таван жилийн хугацаа бол манай компанийн хувьд үйл ажиллагаагаа жигдрүүлж, шинэ үйлдвэрүүдээ байгуулж, технологио шинэчилж, бүтээгдэхүүнийхээ чанарыг сайжруулж, ирээдүйд чиглэсэн шинэ төслүүдээ хөдөлгөх өрнүүн их ажлын он жил байлаа. 

Нийслэлийн гэр хорооллын айл өрхийг шахмал түлшээр тасралтгүй найдвартай хангах чиг үүрэгтэй манай компани цаашлаад судалгаа, шинжилгээгээ үр дүнд хүргэх, дэвшилтэт технологи нэвтрүүлэх, бүтээмжээ сайжруулах, өртөг зардлаа бууруулах гээд бидний ойрын ирээдүйд хийх ажил их байна.       

Улаанбаатар хотын агаарын бохирдлыг бууруулах бодлогын хүрээнд “Тавантолгой түлш” ХХК-ийн үйл ажиллагааг дэмжиж, хамтран ажилладаг төрийн болон төрийн бус байгууллагууд, аж ахуй нэгжүүд болон хэрэглэгчдэдээ талархал илэрхийлье. 

“ТАВАНТОЛГОЙ ТҮЛШ” ХХК-ИЙН ГҮЙЦЭТГЭХ ЗАХИРАЛ

Ц.ДАВААЦЭРЭН