Тавантолгой түлш ХХК шахмал түлшний түүхий эд мидлингээ Өмнөговь аймгийн Цогтцэций суманд байрлах Энержи ресурс ХХК-ийн уурхайгаас төмөр замаар тээвэрлэн татдаг болжээ. Шахмал түлшний түүхий эд мидлинг татан авахад зориулж баруун болон зүүн үйлдвэртээ ачааны вагон хүлээн авах төмөр замуудыг барьж ашиглалтад оруулаад байгаа юм. Зүүн үйлдвэрт нэг ээлжиндээ 27 вагон хүлээн авах хүчин чадалтай өндөрлөгөөтэй тавцан бүхий 303 м урттай төмөр замыг барьж ашиглалтад оруулсан бол баруун үйлдвэрийн хашаанд байх ашиглагдахгүй орхигдсон хоёр замыг засварлан ашиглалтад оруулжээ. Өнөөдрийн байдлаар төмөр замаар 209,0 мянган тонн мидлинг таван авч, тонн тутмаас 21,826 төгрөг нийт 5,6 тэрбум төгрөгийг түүхий эдийн тээвэрлэлтээс хэмнэсэн тоо үзүүлэлт гарчээ. Улаанбаатар хотын гэр хорооллын айл өрхүүд галлагааны улиралд 480-600 мянган тонн шахмал түлш хэрэглэдэг бол одоо 400 орчим мянган тонн мидлингийг энэ зун татан нөөцлөх юм байна.

Тавантолгой түлш ХХК хүний нөөц, ажилтнуудынхаа нийгмийн асуудалд онцгой анхаарал хандуулан ажиллаж байна. Тодруулбал, Нийгмийн хамгаалал, хөдөлмөрийн яамтай хамтран 1700 гаруй ажилтан ажиллаж байгаа хөдөлмөрийн хүнд, хортой 30 ажлын байранд үнэлгээ хийлгэсэн байна. Үүнээс хүнд хортой нөхцөлтэй 12 ажлын байрны 1298 ажилтны ажлын байрыг хүнд хортой нөхцөлд тооцож, хуульд нийцүүлжээ. Ийнхүү хуульд нийцүүлснээр дээрх ажилтнуудад сард дунджаар 50 гаруй сая төгрөгийн нэмэгдэл олгож байна. Дээрх ажилчдыг хөдөлмөрийн хүнд хортой нөхцөлд хамруулснаар тэтгэвэрт гарах насыг таван жилээр наашлуулах, цалин нэмэгдэх амралтын хугацаа уртсах боломжтой юм. Хуульд нийцүүлснээр эхний таван жилд 102, арван жилийн хугацаанд 153 хүн тэтгэвэрт гарах юм байна. Мөн ажилтнуудыг хавар, намартаа эрүүл мэндийн урьдчилсан үзлэгт хоёр үе шаттайгаар хамруулж, нийт 1864 ажилтныг лабораторын шинжилгээнд хамруулжээ. Нийгмийн асуудлыг шийдвэрлэх ажлын хүрээнд компанийн нийт ажилтны цалингийн сүлжлэлийн нэгдсэн журам батлуулж ажилтны сарын үндсэн цалинг дунджаар 15 хүртэл хувиар нэмсэн байна. Мөн "Гүйцэтгэлийн үр дүнгээр нэмэгдэл хөлс олгох тухай журам"-ыг шинэчлэн 170 албан тушаалын 1800 гаруй ажилтанд 700,0 сая төгрөгийн хүйтний нэмэгдэл олгожээ.  Эх сурвалж: Өглөөний сонин

Нийслэлчүүдийн тэн хагасыг дулаан өвөлжүүлэх үүрэг хүлээдэг Тавантолгой түлш компанийнхан техникийн хүчин чадлаа нэмэгдүүлжээ. Тус компани 2018 онд байгуулагдсан ч өнгөрсөн хугацаанд өөр хоорондоо хамаарал бүхий хоёр том асуудалтай нүүр тулж иржээ. Нэг нь, Баруун үйлдвэрийн ачааллыг бууруулах, нөгөө нь Зүүн үйлдвэрийг төлөвлөсөн хүчин чадалд нь хүргэж ажиллуулах. Тэр үед нийт үйлдвэрлэлийн 80 орчим хувийг Баруун үйлдвэр нуруундаа үүрч байсан юм. Үүнээс үүдэлтэй орчны бохирдол үйлдвэрийн орчмын оршин суугчдын эрүүл орчинд амьдрах эрхийг зөрчиж байлаа. Тиймээс Баруун үйлдвэрийн ачааллыг шат дараатай бууруулж, яваандаа үйлдвэрлэлийг зогсоох бодлогыг Засгийн газраас барих болсон.  Ингэхийн тулд Зүүн болон Төвийн үйлдвэрийн хүчин чадлыг нэмэгдүүлэх ёстой. Тухайн үед Зүүн үйлдвэр бүрэн хүчин чадлаараа ажиллаж чадахгүй байсан бөгөөд шахмал түлшийг хэвлэх болон хатаах зэрэг тоног төхөөрөмжүүд нь үйлдвэрлэлийн горимд жигдрээгүй байсан аж. Угтаа Зүүн үйлдвэрийг анх байгуулахдаа Баруун үйлдвэрийн ачааллыг өөртөө авах хэмжээний хүчин чадалтай байхаар тооцсон билээ. Гэвч 2021 онд үйлдвэрлэсэн түлшний хэмжээг авч үзвэл, Зүүн үйлдвэр нийт түлшний дөнгөж 13.9 хувийг үйлдвэрлэсэн нь тус компанийн жил жилийн үйлдвэрлэлийн мэдээг харвал тодорхойлогдоно. Үүнийг засч залруулах ажлыг тус компанийн инженер, техникийн ажилтнууд цаг алдалгүй хийж үйлдвэрүүдийн ачааллыг тэнцвэржүүлээд байгаа гэнэ. Тодруулбал, Зүүн үйлдвэрийн хоёрдуаар цехийн 1, 2, 3-р шугамын хавтант хатаагчийн угсралт, суурилуулалтын ажлыг 2022-2023 оны өвлийн ачааллаас өмнө бүрэн дуусгаж чанар, стандартын шаардлага хангасан шахмал түлш үйлдвэрлэж эхлэв. Мөн нэгдүгээр цехийн 1, 2, 3-р шугамд БНСУ-ын Jeil machinery компанийн үйлдвэрлэсэн гурван ширхэг хэвлэгч төхөөрөмжийг шинээр суурилуулсан байна. Үүний үр дүнд Зүүн үйлдвэр 2022 онд хоёр дахин их түлш үйлдвэрлэж нийт түлшний 25.5 хувийг үйлдвэрлэсэн байна. Харин энэ онд нийт үйлдвэрлэлийн 54.1 хувийг бүрдүүлэхээр төлөвлөж, үйлдвэрээ жигдрүүлээд байгааг тус компанийнхан ам нэгтэй ярьж байна. Шахмал түлш бидний хувьд цоо шинэ зүйл биш. Үе үеийн Засгийн газар агаарын бохирдолтой тэмцэх хөтөлбөр боловсруулж шахмал түлшний үйлдвэр барьж байсан түүх бий. Гэвч түүхий нүүрстэйгээ зэрэгцүүлж худалдаалсан нь амжилтад хүрээгүй гэдэг. Өмнөх хөтөлбөрүүдийн үлдэгдэл нь ТЭЦ-2-ийн дэргэдэх шахмал түлшний үйлдвэр юм. Энэ үйлдвэрийг Тавантолгой түлш ХХК байгуулагдсан цагаасаа эхлэн өөрийн болгож шахмал түлш үйлдвэрлэж эхэлсэн. Тус үйлдвэр өдөрт 300 хүртэлх тонн шахмал түлш үйлдвэрлэх хүчин чадалтай байж. Харин үүний хүчин чадлыг тус компанийнхан нэмэгдүүлж өргөтгөл хийснээр хүчин чадал нь 2,5 дахин нэмэгдүүлж өдөрт 800 тонн түлш үйлдвэрлэх боломжтой болгожээ. Энэ нь Улаанбаатар хотын түлшний хэрэглээний 43 хувийг дангаараа хангах боломжтой болоод байгаа гэнэ. Төвийн үйлдвэр 2021 онд нийт үйлдвэрлэлийн 7.6 хувийг бүрдүүлж байсан бол энэ онд нийт түлшний 25.6 хувийг үйлдвэрлэхээр тооцоолжээ. Энэ мэтээр Тавантолгой түлшийнхэн үйлдвэрийн хүчин чадлаа нэмэгдүүлж ирэх өвлийн бэлтгэлээ базаасаар байна.  Эх сурвалж: Өглөөний сонин

Тавантолгой түлш ХХК-ийн удирдах албан тушаалтнууд өнөөдөр байгалийн гамшгийн үед хэрхэн ажиллах талаар сургалтад хамрагдлаа. Энэхүү сургалт нь гамшиг осол, гал түймрийн аюулаас урьдчилан сэргийлэх, эрсдэлийг бууруулах, бэлэн байдлаа хангах, байгууллагын ажилтан алба хаагчдын гал унтраах анхан шатны багажтай зөв харьцах чадварыг дээшлүүлэх зорилготой юм. Сургалтаар Гамшгаас хамгаалах тухай хууль, Галын аюулгүй байдлын тухай хуулийн холбогдох заалтууд, тэдгээртэй нийцүүлэн гаргасан норм, дүрэм стандарт, болзошгүй гал түймрийн аюулаас урьдчилан сэргийлэх арга ажиллагаа, гал түймрийн үед хүмүүсийг аврах зам гарц, гал унтраах анхан шатны багаж хэрэгслийг ашиглах талаар, газар хөдлөлтийн тухай ойлголт, өөртөө болон бусдад анхны тусламж үзүүлэх мэдлэг чадварыг олголоо. Сургалтад Захиргаа удирдлагын дарга Э.Ууганцэцэг, Санхүү, эдийн засгийн газрын дарга А.Батзориг, Yйлдвэрлэл техник, технологийн газрын дарга бөгөөд Ерөнхий инженер Ц.Алтансүх болон үйлдвэр, хэлтэс, нэгжийн удирдах албан тушаалын 22 хүн хамрагдлаа.

"Тавантолгой түлш" ХХК ирэх өвлийн бэлтгэл хангах ажлыг эхлүүлээд байгаа аж. Нийслэлийн гэр хорооллын 200 орчим мянган айл өрх галлагааны улирал буюу есдүгээр сарын 15-аас дараа оны тавдугаар сарын 15 хүртэл шахмал түлшийг худалдан авч хэрэглэдэг. Нэг галлагааны улиралд 480-600 орчим мянган тонн шахмал түлш хэрэглэдэг байна. Тэгвэл ирэх өвлийн бэлтгэл ажлыг хэрхэн хангаж, хэдий хэмжээний түлшний нөөц бүрдүүлээд байгаа талаар тус компанийн Борлуулалт, хадгалалтын хэлтсийн дарга О.Мишээлээс тодрууллаа. -Тавантолгой түлш ХХК тавдугаар сарын 15-аар шахмал түлшнийхээ борлуулалтыг зогсоосон. Гэвч цаг агаар хүйтэн байсантай холбоотойгоор "шахмал түлш олдохгүй байна" гэх гомдол иргэдийн дунд нэлээд байсан. Шахмал түлшийг зундаа худалдан борлуулах уу? -Галлагааны улирал буюу есдүгээр сарын 15-аас дараа оны тавдугаар сарын 15 хүртэл шахмал түлшийг нийслэлийн долоон дүүрэгт гэрээт цэгүүдээр дамжуулан худалдан борлуулдаг. Энэ нь орон сууцны айлын дулаан авах хугацаатай адил байдаг гэсэн үг. Тэгэхээр энэ хугацаанд л бид шахмал түлшийг ямар нэгэн тасалдал, чирэгдэлгүйгээр нийлүүлж, гэр хорооллын айл өрхүүдэд худалдан борлуулах үүргийг хүлээдэг гэсэн үг. Энэ жилийн тухайд тавдугаар сарын 15-нд борлуулалт зогсоосон ч цаг агаар хүйтэн, цас орсон болохоор борлуулалтын хугацааг дөрөв хоногоор сунгасан. Зун түлш худалдан борлуулахгүй. -Өвлийн бэлтгэл хангах ажлыг эхлүүлсэн гэж байсан. Түлшний нөөц хэрхэн бүрдүүлж байна вэ? -Манай компани галлагааны улирал зогсохооос өмнө дөрөвдүгээр сараас эхлээд дараа өвлийн бэлтгэл ажлыг хангах төлөвлөгөө боловсруулдаг. Энэ ажлын хүрээнд галлагааны улиралд хэрэглэх шахмал түлшний нөөц бүрдүүлэх ажлыг эхлүүлдэг гэсэн үг. Ингэхдээ шахмал түлшийг зайлшгүй битүү агуулахад хадгалдаг учир үйлдвэрийн батлагдсан төлөвлөгөөгөө, албан хүсэлтийн хамт Нийслэлийн агаар, орчны бохирдолтой тэмцэх газарт хүргүүлдэг. Үүний дагуу тухайн газар, манай байгууллагаас хамтарсан ажлын хэсэг гарч нийслэлд түлш нөөцлөх агуулахын судлагааг гаргаад шаардлагад нийцсэн агуулахын эзэдтэй түрээсийн гэрээ байгуулдаг. Тухайн түрээслэсэн агуулахдаа өвөл хэрэглэх шахмал түлшийг борооны усанд норгохгүй, агаар салхинд илжрүүлэхгүй байдлаар хадгалж нөөцөлдөг. Энэ жилийн тухайд 5, 6-р саруудад 50.000 тонн шахмал түлш нөөцлөөд долоодугара сард амарч үйлдвэрийн шугамуудад урсгал засварын ажил хийнэ. Ингээд 8, 9-р саруудад 50.000 тонн шахмал түлш нөөцлөхөөр төлөвлөсөн. -Есдүгээр сарын 15-аас шахмал түлшний борлуулалт эхэлнэ. Борлуулалтын цэгүүдээ хэрхэн сонгон шалгаруулдаг вэ. Ирэх намар шинээр цэг нээх үү, эсвэл хуучин цэгүүдээ үргэлжлүүлэн ажиллуулах уу? -Борлуулалтын цэгээр ажиллах хүсэлтийг бид аль болох нээлттэй явуулахыг зорьдог. Тиймээс компанийн вэб сайтаар дамжуулан цахимаар хүсэлтийг хүлээн авдаг. Өнгөрсөн хугацаанд ажилласан цэгүүдийн бүртгэлийг ч цахимаар авсан. Ирсэн хүсэлтүүдээс шаардлага хангаж байгаа хувь хүнтэй гэрээ байгуулдаг. Мэдээж цэгээр ажиллах бол өөрийн гэсэн хашаатай, битүү агуулахтай, түлш хураах дэр мод буюу подонтой, галын аюулгүй байдлыг хангасан, том оврын машин орох талбайтай байх гээд тодорхой шаардлагууд бий. Бид энэ жил ажилласан цэгүүдээсээ санхүүгийн, картын, үүрэг даалгаврын зөрчилгүй борлуулалтын 500 цэгийг үргэлжүүлэн ажиллуулах хүсэлтийг компанийн захирлын зөвлөлийн хуралд танилцуулна. Захирлын зөвлөлийн хурлаас хэрхэн шийдвэр гарна түүний дагуу явна гэсэн үг. -Шахмал түлш худалдаалж эхэлснээс хойш зөвхөн картаар долоо хоногт 6 шуудайг олгоно гэдэг шийдвэр гарсан. Үүнийг өнгөрсөн өвөл л нэгээр нэмэгдүүлсэн байсан. Цаашид нэмэгдүүлэх үү? -Долоо хоногт 6 шуудай гэдгийг судлагаанд суурилж гаргасан тоо юм билээ. Түүхий нүүрс түлж байх үед нийслэлд жилдээ 1,2 сая тонн түүхий нүүрс хэрэглэдэг байсан. Шахмал түлш хэрэглэснээр үүний хоёр дахин багаж жилдээ 600 мянган тонн шахмал түлш хэрэглэх тооцоо гарсан. Нэг айл жилдээ гурван тонн шахмал түлш хэрэглэнэ гэж үзвэл долоо хоногт 6 шуудай түлш байх юм байна гэж тооцож гарсан юм билээ. Гэвч том хэмжээтэй байшин, нам даралтын зуухтай айл өрхүүдэд энэ тоо хүрэлцэхгүй байна гэдэг гомдол олноор ирсэн учир үүнийг нэгээр нэмэгдүүлэх шийдвэрийг өнгөрсөн өвөл гаргаж долоо хоногт долоон шуудай түлш олгож эхэлсэн. -Энэ галллагааны улиралд хэдэн тонн шахмал түлш борлуулав. Ирэх жил хэдэн тонныг борлуулахаар төлөвлөсөн бэ? -Энэ галлагааны улиралд 486 мянган тонн түлшийг худалдан борлуулсан байна. Ирэх жилийн галлагааны улиралд ч бид энэ хэмжээний түлш худалдан борлуулахаар тооцоолж байна. Эх сурвалж: Өглөөний сонин

Тавантолгой түлш ХХК-ийн Захиргаа удирдлагын газар, Хүний нөөц, сургалтын хэлтэс, Баруун үйлдвэрийн удирдлага хамт олноос санаачлан Эх, үрсийн баярыг тохиолдуулан Алдарт эхийн I, II одонтой ээжүүдээ хүлээн авч хүндэтгэл үзүүллээ. Тавантолгой түлш ХХК нь 2700 гаруй ажилтантай бөгөөд улирлын чанартай ажилладаг юм. Баруун үйлдвэрт ажиллаж байгаа эмэгтэйчүүдээс алдарт эхийн одонтой 40 ээж байна. Үүний гурав нь нэгдүгээр зэргийн одонтой байгаа бол 37 нь хоёрдугаар зэргийн одонтой байлаа. Алдарт ээжүүдийн хамгийн залуу нь 30 настай, дөрвөн хүүхдийн ээж байлаа. Алдарт ээжүүддээ Захиргаа удирдлагын газрын дарга Э.Ууганцэцэг, Чанар, борлуулалтын газрын дарга Г.Ундармаа, Баруун үйлдвэрийн дарга Д.Миняа нар баярын мэндчилгээ дэвшүүлсэн юм.  Компанид ажиллаж байгаа нийт ажилтны 20 орчим нь эмэгтэйчүүд эзэлж байна. Дээрх эмэгтэйчүүдээс удирдах албан тушаалтнаас үйлдвэрийн ажилтан гээд бүх салбарт эмэгтэйчүүдийн оролцоо байгааг Үйлдвэрийн дарга Д.Миняа онцолж байлаа.   

Хүний нөөц, сургалтын хэлтсээс компанийн ажилтнуудын мэдлэг ур чадварыг дээшлүүлэх, сурч хөгжих орчин нөхцөлийг бүрдүүлэх техникийн номын сантай болох зорилгоор номын хандивын аяныг 2023 оны тавдугаар сарын 15-30-ны хооронд компанийн хэмжээнд зохион байгуулж байна. Газар, хэлтэс үйлдвэр, нэгжүүд инженер, техникийн чиглэлийн 20-иос доошгүй ном, гарын авлага, аюулгүй ажиллагааны дүрэм, техник ашиглалтын дүрэм, стандартууд, ХАБЭА хууль тогтоомж дүрэм журмын ном хандивлах юм. Тус аяны хүрээнд өнөөдөр Захиргаа, удирдлагын газрын дарга Э.Ууганцэцэг ХАБЭА хууль тогтоомж, дүрэм журмын 40 ширхэг ном, гарын авлагыг Хүний нөөц, сургалтын хэлтэст гардуулан өглөө. Хандивт цугларсан номыг номын санд байршуулж, ажилтан, албан хаагчдыг ном унших боломжоор хангах юм. Эрчим хүчний тоног төхөөрөмж, байгууламжийн техник ашиглалтын дүрэмд Үйлдвэр бүр техникийн номын сан, зохих шаардлага хангасан техник хэрэгсэл материалаар тоноглогдсон, техник технологийн ба хөдөлмөр хамгаалал, галын аюулаас урьдчилан сэргийлэх сургалтын байр танхимтай байхаар заасан байдаг байна.

  Дотоодын цэргийн 05 дугаар ангийн Тавантолгой түлш ХХК дахь гэрээт салбарын шинэ байрны нээлт өнөөдөр боллоо. Тус анги 2020 оноос хойш Тавантолгой түлш ХХК-ийн баруун үйлдвэрийн улсын онцгой обьектод авч Дотоодын цэргийн 05 дугаар ангийн салбар 24 цагаар хамгаалан ажиллаж байгаа билээ. Салбар ангийн албан хаагчдын ажлын байр, харуулын шалган нэвтрүүлэх байрыг 2021 онд шав тавьж эхлүүлсэн ч дэлхий нийтийг хамарсан цар тахал, ковидын нөлөөллөөс болж барилгын ажил удааширч өнгөрсөн онд ашиглалтад оруулаад байсан бол өнөөдөр албан ёсоор хүлээн авлаа.  Шинэ байр ашиглалтад орсоноор үйлдвэрийн орчныг 24 цагийн турш харж хамгаалж байгаа Дотоодын цэргийн алба хаагчдын ажиллах орчин нөхцөл сайжирч байна гэдгийг тус ангийн захирагч Хурандаа Ж.Мөнхсолонго онцолж байлаа. Тэрээр, "Манай албан хаагчдын ажиллах орчин нөхцлийг дэмжиж шинэ байр барьж өгч байгаа Тавантолгой түлш" ХХК-ийн удирдлага, хамт олонд талархал илэрхийлье. Шинэ ажлын байр ашиглалтад орсоноор Дотоодын цэргийн анги байгууллагын хуулиар хүлээсэн үүргээ хэрэгжүүлэхэд дэвшил гарч байгаа" гэв. Тавантолгой түлш ХХК-ийн Гүйцэтгэх захирал Ц.Даваацэрэн, "Та бидний хамтын ажиллагаа улам бэхжих болтугай. Төр, түмнийхээ хүлээсэн үүргээ нэр төртэй биелүүлэхэд бидний үйл ажиллагааг дэмжин ажиллаж байгаа та бүхэнд талархал дэвшүүлье" гэлээ. Шинэ байраа хүлээн авч, гадна орчны тохижуулах, Ерөнхийлөгчийн санаачилсан "Тэрбум мод" хөтөлбөрийг дэмжиж ангийн захирагч, компанийн удирдлагууд мод тарьсан юм.    

"Таван толгой түлш’ ХХК-ийн удирдах бүрэлдэхүүн 2023 оны 5-р сарын 23 ны өдөр Нийслэлийн онцгой байдлын газарт стратегийн команд штабын дадлага сургуулилтад хамрагдлаа.  Сургуулилтыг Нийслэлийн онцгой  байдлын газрын дэд дарга, хурандаа Э.Эрдэнэбаатар  удирдан явуулсан юм. Дадлага сургуулийн зохион байгуулалт, бэлтгэл ажлын үр дүн, дадлага сургуулийн үеэр гамшгаас хамгаалах мэргэжлийн ангийн гүйцэтгэх үүрэг, хэрэгжүүлэх ажлын талаар мэдээ, мэдээллийг хүргэв. Сургалтад Захиргаа удирдлагын дарга Э.Ууганцэцэг, Санхүү, эдийн засгийн газрын дарга А.Батзориг, үйлдвэр болон хэлтсийн дарга нар нийт 21 удирдах албан хаагч хамрагдлаа.  

Монгол Улсын Ерөнхийлөгчийн санаачилсан "Тэрбум мод" үндэсний хөтөлбөрийг дэмжин Тавантолгой түлш ХХК-ийн ажилтан албан хаагчид "Нэг ажилтан-нэг мод" аяныг хоёр дахь жилдээ хэрэгжүүлэн ажиллаж байгаа билээ. Аяны хүрээнд баруун болон зүүн үйлдвэрийн орчинд улиас, улиангар модны 2-3 настай суулгацыг тарилаа. Үйлдвэрийн орчинд мод тарьсанаар ажилчдын ажиллах орчинг сайжруулах, ногоон байгууламж бий болгох, орчны чийгшил нэмэгдүүлэх, тоосжилтыг бууруулах ач холбогдолтой юм. Улиангар нь гэрэлд дуртай, хэт халуун ба хүйтэн, хүчтэй салхи зэрэгт тэсвэртэй, хөрс гололгүй ургадаг гэдгээрээ онцлогтой.

Тавантолгой түлш ХХК Монгол Улсын 2022 оны төрийн өмчит ТОП-10 аж ахуй нэгжийн нэгээр шалгарлаа.Монгол Улсад төлсөн татвар, борлуулалтын орлогоороо зургаадугаар байрт эрэмбэлэгдсэнийг Үндэсний худалдаа аж үйлдвэрийн танхимаас баталгаажуулан шилдэг аж ахуй нэгжээр тодруулжээ.

Тавантолгой түлш ХХК 2022-2023 оны галлагааны улиралд нийслэлийн гэр хорооллын айл өрхүүд, нам даралтын болон уурын зуухны халаалттай аж ахуй нэгж байгууллагуудад 485.104,8 тонн сайжруулсан шахмал түлш худалдан борлуулжээ. Гэр хорооллын айл өрхүүдийг шахмал түлшээр тасралтгүй найдвартай хангах үүднээс гэрээт борлуулалтын 650 цэгийг нийслэлийн долоон дүүрэгт хүн амын тоо, байршилтай нь уялдуулан нээж ажиллуулсан байна. Шахмал түлшний борлуулалтын оргил үе нь арванхоёрдугаар сар болон нэгдүгээр сар байсан гэдгийг албаныхан онцолж байна. Хүйтний эрч эрс чангарсан дээрх саруудад өдөрт 2900, сард 87000 тонн шахмал түлш борлуулсан гэсэн статистик үзүүлэлт байна. Гэр хорооллын айл өрхүүдэд шахмал түлш борлуулж эхэлснээс хойших хугацаанд "түлш тасарлаа, олдохгүй байна. Хүрэлцэхгүй байна" гэх гомдол тасардаггүй байсан бол энэ жил иргэдийн гомдол санал бага байсан гэдгийг тус компанийн Борлуулалт, хадгалалтын хэлтсийн дарга О.Мишээл ярилаа. Хэдий зуны тэргүүн сар дөхөж байгаа ч цаг агаар дулаарахгүй байгаа учир борлуулалтын 41 цэгээр 2050 тонн түлшийг борлуулах аж. Тавантолгой түлш ХХК-ийн хувьд өвлийн бэлтгэл ажлыг өмнөх оны хавраас эхлүүлдэг болоод байгаа аж. Өнгөрсөн оны тухайд өвлийн бэлтгэл ажлын хүрээнд 120.000 тонн шахмал түлшийг нийслэлийн долоон дүүрэгт 99 агуулахад нөөцөлж хадгалсан байна. Энэ нь өмнөх онуудаас харьцангуй олон тонн түлшний нөөц аж. 2023-2024 оны галлагааны улиралд зориулан 100000 тонн түлш нөөцлөх төлөвлөгөө гаргасан бөгөөд 5, 6-р сард 50.000 тонн, 8, 9-р сард 50.000 тонн шахмал түлш нөөцлөх юм байна. Жил бүрийн хавар нүүрсний тортогт дарууллаа гэх гомдол Сонгинохайрхан дүүргийн 22 дугаар хорооныхноос гардаг байсан. Тэгвэл ийм гомдол энэ жил харьцангуй бага байгаа нь баруун үйлдвэрийн хүчин чадал, ажиллах шугамын тоог хэрэглээтэйгээ уялдуулан цөөлж, багасгажээ. Ингэснээр бутлуураас үүсэх тоосонцор багасч, агаарт хаягдах тоос эрс багассан байна. Цаашид баруун үйлдвэрийн ажиллах шугамын тоог цөөлөх бодлого барьж байгаа аж. Учир нь зүүн болон төвийн үйлдвэрт техникийн шинэчлэлийн ажлыг өнгөрсөн жил хийж хүчин чадлыг нэмэгдүүлээд байгаа билээ.