Тавантолгой түлш компани шахмал түлшний түүхий эдийн нэг болох барьцалдуулагч бүтээгдэхүүн үйлдвэрлэгч үндэсний компаниудыг хүлээн авч уулзлаа. Уулзалтад шахмал түлшний барьцалдуулагч үйлдвэрлэх чиглэлээр үйл ажиллагаагаа явуулж буй Бэл Кросс ХХК, Баялаг Эрдэм Цом ХХК, Виртуал Софт ХХК, Гарааны Баргил Тех ХХК, Ганхүдэр Орд ХХК, Хангай Хан Өндөр ХХК, Өлзийт Төв ХХК, Каолин Ланд Бридж ХХК гэсэн найман компани оролцлоо. Уулзалтын үеэр компаниуд бүтээгдэхүүн, үйлчилгээ, үйл ажиллагаагаа танилцуулж, туршлага солилцон, хамтын ажиллагааны асуудлуудаа ярилцлаа. Тавантолгой түлш компани жилд 600,000 тонн шахмал түлш үйлдвэрлэж гэр хорооллын айл өрхийн хэрэглээнд нийлүүлдэг. Шахмал түлшний орц, найрлагын 95 хувь нь угааж баяжуулсан нүүрс буюу мидлинг байдаг бол 5 хувийг нь барьцалдуулагч бүтээгдэхүүн эзэлдэг юм. Тавантолгой түлш компани жилд 25 мянга гаруй тонн барьцалдуулагч бүтээгдэхүүн хэрэглэдэг гэсэн тооцоо байдаг бол үүний 50 хувийг БНХАУ-аас импортоор, 50 хувийг дотоодын үйлдвэрлэгч компаниудаас авдаг. Сүүлийн хоёр жил гаруй хугацаанд доломитын орцтой барьцалдуулагч бүтээгдэхүүнийг үндэсний Баргил тех ХХК үйлдвэрлэн шахмал түлшний үйлдвэрлэлд нийлүүлж байгаа юм. Тавантолгой түлш компани ирэх онд барьцалдуулагч бүтээгдэхүүнийг дотоодын үйлдвэрлэгчдээс 100 хувь авахаар төлөвлөөд байна. Ингэхийн тулд үйлдвэрлэгч компаниудад стандартад нийцсэн чанартай бүтээгдэхүүн үйлдвэрлэх, хүн болоод байгаль орчинд сөрөг нөлөө үзүүлэхгүй байх гэсэн үндсэн шаардлагыг тавьж байгаа юм. Цаашлаад техникийн тодорхой шаардлагуудыг хангасан барьцалдуулагч бүтээгдэхүүнийг үйлдвэрлэж чадвал худалдан авч, үйлдвэрлэлийн үйл ажиллагаандаа ашиглах, үйлдвэрлэгч компаниудыг дэмжих чиглэлд хамтран ажиллахад  бэлэн гэдгээ өнөөдрийн уулзалтаар онцоллоо.  

Галлагааны улирал эхэлсэнтэй холбогдуулан Тавантолгой түлш компанийн Хэрэглэгчдэд үйлчлэх төвөөс айл өрхүүдийг угаарын хийн эрсдэлээс урьдчилан сэрэмжлүүлэх ажлыг Нийслэлийн агаар орчны бохирдолтой тэмцэх газар, Нийслэлийн онцгой байдлын ерөнхий газар, Экологийн цагдаагийн газар, Улаан загалмайн нийгэмлэг, Дүүргүүдийн засаг даргын тамгын газартай хамтран 500 гаруй хүний бүрэлдэхүүнтэй зохион байгууллаа. Ажлын хэсэг нийслэлийн 7 дүүргийн гэр хорооллын 100 гаруй хорооны 49,978 өрхөд хүрч ажилласан бөгөөд зуух, пийшингийн битүүмжлэлийг сайжруулах, янданг тогтмол хөөлөх талаар тусламж үзүүлж, зөвлөгөө хүргэсэн байна. Мөн шахмал түлшийг зөв хэрэглэх аргын тухай болон угаарын хийн мэдрэгч төхөөрөмжийг зориулалтын дагуу ашиглах зааврын талаар айл өрхүүдэд дахин мэдээлэл хүргэж угаарын хийн эрсдэлээс сэрэмжлүүллээ. Нийт 50 мянга орчим айл өрхөд хүрч ажиллахад тэдгээрийн 15 мянга 500 гаруй айл нь угаарын хийн мэдрэгчээ ажиллуулаагүй байжээ. Мөн 22 мянга 300 гаруй айл өрх угаарын хийн мэдрэгчгүй (эвдэлсэн, гээж үрэгдүүлсэн) байсан байна. Яндан, зуухны битүүмж алдагдалтай өрх 2 мянга 200 гаруй байжээ. Эдгээр тоо нь угаарын хийн эрсдэл гэр хорооллын айл өрхүүдэд олон мянгаараа байгааг илтгэнэ. Угаарын хийн аюул бол байгалийн гамшиг шиг давагдашгүй хүчин зүйл биш. Энэ бол урьдчилан сэргийлж болдог эрсдэл юм. Тиймээс сонор сэрэмжээ дээшлүүлж, хариуцлагатай амьдарч, гэр бүл, хайртай хүмүүсээ хамгаалахыг Хэрэглэгчдэд үйлчлэх төвөөс анхааруулж байна.

  Улирал солигдож, цаг уурын төлөв байдал хүйтэнд шилжиж, агаарын даралт өөрчлөгдөж буй энэ үед угаарын хийн эрсдэл улам нэмэгддэг. Тиймээс айл өрхүүдэд дараах сэрэмжлүүлгийг хүргэж байна. Угаарын хий мэдрэгчийг унтраахгүй байх, батарей нь дууссан бол яаралтай солих Дамжуулагчтай угаарын хийн мэдрэгчийг салгахгүй байх (дамжуулагчтай угаарын хий мэдрэгч нь тухайн айлд угаарын хий алдагдаж байгааг Хэрэглэгчдэд үйлчлэх төвийн хяналтын системд мэдэгддэг) Ханан пийшингийн болон зуухны битүүмжээ сайтар шалгах Удаан хугацаанд галлагаа хийгээгүй зуух, пийшинг галлахдаа болгоомжтой байх Ханан пийшин болон яндангаа сайн хөөлөх Угаарын хийн аюул бол урьдчилан сэргийлж болдог эрсдэл юм. Тиймээс гэр бүл, хайртай хүмүүсээ хамгаалахын тулд анхаарал болгоомж, сонор сэрэмжээ дээшлүүлье. "Тавантолгой түлш" ХХК  

"Тавантолгой түлш" ХХК-ийн "Чанарын хяналтын хэлтэс"-ээс зохион байгуулж явуулж буй "Чанар бидний зорилт" аяны хүрээнд "ЧАНАР МАНАЙ ДУРАНД" гэрэл зургийн уралдаан нийт ажилтан албан хаагч, гэрэл зураг сонирхогч залуусын дунд зохион байгуулж байна. Уралдааны удирдамж  

Тавантолгой түлш компани "Хөдөлмөрийн аюулгүй байдал, эрүүл ахуйн нээлттэй өдөрлөг"-ийг жил бүр уламжлал болгон зохион байгуулдаг. Энэ жилийн өдөрлөгийг "Хөдөлмөрийн аюулгүй байдлын-Мэдлэг" сэдвийн доор зохион байгуулж байна. Өдөрлөгөөр үйлдвэрийн тоног төхөөрөмжийн болон тоног төхөөрөмж хариуцагч албан тушаалтан, нарядаар ажил гүйцэтгэгчийн ажлын аюулгүй ажиллагааны зааварчилгаа боловсруулах, мөрдүүлэх, үйлдвэрийн ажилтны ажлын байрны эрсдэлийн үнэлгээг тухайн цехийн дарга, ИТА, ээлжийн ахлах, шугамын ахлах, тоноглолын машинч нар хамтран гүйцэтгэх зэрэг ажлыг хэрхэн хийх тухай заавар зөвлөгөөг өгсөн юм. Мөн илэрсэн аюул, ХАБЭА-н зөрчлийг арилгуулах, цаашид учирч болох аюул ослоос урьдчилан сэргийлэх арга хэмжээг зохион байгуулах, эрсдэлээс бууруулах арга хэмжээ авч ажиллах, сэрэмжлүүлэг мэдээ мэдээллийг хэрхэн урьдчилан өгөх тухай мэдлэгийг ч өдөрлөгийн үеэр ажилтан бүрт өгсөн юм. Хөдөлмөрийн аюулгүй байдал гэдэг бол ажилтан бүрийн чанад сахих, хэрэгжүүлэх хамгийн чухал зүйл гэдгийг компанийн Гүйцэтгэх захирал Ц.Даваацэрэн нээлтийн үеэр онцолж байлаа. Манай компанийн хувьд сүүлийн жилүүдэд хөдөлмөрийн аюулгүй байдлын зөрчилгүй ажиллаж байгааг ч холбогдох албаныхан онцолсон. 2023-2024 оны галлагааны улирал эхэлж, үйлдвэрүүдийн үйл ажиллагаа жигдэрч, өвлийн ачааллын үе эхэлж байгаатай холбогдуулан хөдөлмөрийн аюулгүй байдлын осол авааргүй ажиллахыг өдөрлөгийн үеэр бүх ажилчдад сануулсан юм.

Төрийн өмчийн бодлого, зохицуулалтын газрын 2023 оны 09 дугаар сарын 21-ний өдрийн 454 дугаар тогтоолын дагуу Шакмен маркийн 37 ширхэг автосамосвалыг нээлттэй дуудлага худалдаагаар худалдана. 2. Дуудлагын худалдаанд хүсэлт ирүүлэх, оролцогчийг бүртгэх Дуудлагын худалдаанд оролцох саналыг батлагдсан маягтын дагуу бөглөж, гарын үсэг зурж баталгаажуулан, дэнчин төлснийг нотлох банкны баримт, иргэний үнэмлэх (хуулийн этгээдийн хувьд улсын бүртгэлийн гэрчилгээний хуулбар, итгэмжлэгдсэн төлөөлөгчийн бичиг баримт)-ний хуулбарын хамт дугтуйд хийж, дугтуйн гадна талд авах автомашиныхаа марк улсын дугаарыг бичиж, Чингилтэй дүүргийн 1 дүгээр хороо Жигжиджавын гудамж 8 "Тавантолгой Түлш" ХК, "Эрдэнэс Тавантолгой" ХК-ийн Б байр / Хуучнаар 1072 хувьцааны мэдээллийн төв/-д байрлах саналын хайрцагт хийнэ. Санал авах сүүлийн хугацаа 2023 оны 11 дүгээр сарын 13-ны өдрийн 09 цаг 30 минут хүртэл. Хугацаа хоцорсон хүсэлтийг хүлээн авч бүртгэх, үнэ хаялцуулах ажиллагаанд оролцуулах боломжгүйг анхаарна уу. 3. Худалдах хөрөнгийн талаар мэдээлэл авах Дуудлагаар худалдах хөрөнгийг өмч эзэмшигч Төв, Сэргэлэн, 1-р баг, Баянбүрд, Баян уулын баруун талд 0 тоот байрлах "Тавантолгой Түлш" ХК–ний Зүүн үйлдвэрийн байранд очиж үзэж болох бөгөөд хөрөнгийн талаарх мэдээллийг утсаар авах 99103608, очиж үзэх 80508811 утсаар холбогдоно уу.

ХАМТРАН АЖИЛЛАХ УРИЛГА Зарласан огноо: 2023 оны 10-р сарын 05ны өдөр Нийслэлийн Налайх дүүргийн Засаг даргын 2023 оны 01 дүгээр сарын 19-ний өдрийн А/23 тоот Захирамжаар Налайх дүүргийн 7 дугаар хороо, Өвөршанд хаягт "Тавантолгой түлш" ХХК-ийн нэр дээр орон сууцны зориулалтаар олгогдсон 5 га газарт барилга угсралтын чиглэлээр үйл ажиллагаа эрхэлдэг туршлагатай, санхүүгийн чадвахитай, өөрийн хөрөнгөөр  орон сууц барьж хүлээлгэн өгөх байгууллага, ААН-ийг хамтран ажиллахыг урьж байна. Шаардлагатай материалууд Хамтран ажиллах сонирхолтой хуулийн этгээд нь дараах мэдээллийг  бүрдүүлэн ирүүлнэ. 1. Аж ахуй нэгжийн танилцуулга, хэрэгжүүлж байсан төсөл хөтөлбөрүүд 2. "Тавантолгой түлш" ХХК-ийн ажилчдад хөнгөлттэй нөхцлөөр олгох орон сууцны тоо хэмжээ, үнэ, төсөл хэрэгжүүлэх хугацаа, хотхоны зохион байгуулалт зэрэг бусад шаардлагатай мэдээллийг агуулсан хамтран ажиллах санал; 3. Татварын тодорхойлолт /зар нийтлэгдсэн өдрөөс хойш татвар, хураамж, төлбөрөө бүрэн төлсөн байна/ 4. Харьяа дүүргийн Нийгмийн даатгалын хэлтсээс нийгмийн даатгалын шимтгэлийн өргүй тухай тодорхойлолт 5. Шүүхийн шийдвэр гүйцэтгэх газрын тодорхойлолт 6. Хугацаа хэтэрсэн зээл болон зээлийн хүүгийн өргүй тухай харилцагч банкны тодорхойлолт 7. Улсын бүртгэлийн гэрчилгээний нотариатаар батлуулсан хуулбар 8. Оролцогчийг төлөөлж гарын үсэг зурах этгээдийн итгэмжлэл 9. Шүүхийн ерөнхий зөвлөлийн төрөлжсөн архивын тодорхойлолт 10. Шүүхийн шийдвэр гүйцэтгэх газрын тодорхойлолт 11. Санхүүгийн тайлан ирүүлэх жилийн тоо: 2021, 2022 онуудын санхүүгийн тайлан, баталгаажуулсан аудитын дүгнэлт. Сонгогдсон  хуулийн этгээд нь өөрийн хөрөнгөөр төслийг хэрэгжүүлнэ. Материалыг 2023 оны 10-р сарын 16-ны өдрийн 12:00 цаг хүртэл info@ttt.mn цахим хаягаар авна. Нэмэлт мэдээллийг info@ttt.mn цахим хаягаас авна уу  

Тавантолгой түлш компани инженер, техникийн ажилтнуудынхаа дунд "Инженерийн шийдэл-Хөгжлийн тулгуур" сэдвийн хүрээнд зөвлөгөөн, илтгэлийн уралдааныг зарлалаа. Энэхүү зөвлөгөөн, илтгэлийн уралдаан нь компанийн дунд хугацааны төлөвлөгөө боловсруулах ажлын хүрээнд инженер, техникийн ажилтнуудын дунд шинэлэг санаа, санаачилга, туршлагыг түгээн дэлгэрүүлэх, тулгамдаж буй техник технологийн асуудлууд, тэдгээрийн шийдвэрлэх арга зам эдийн засгийн үр ашиг, цаашдын хөгжлийн чиг хандлагыг тодорхойлох бүтээлч санааг дэмжихэд чиглэгдэж байгаа юм. Уралдаанд инженерүүд ганцаарчилсан болон багийн төрлөөр оролцох боломжтой. Илтгэлийг хоёр үер шаттай зохион байгуулах бөгөөд шалгарсан илтгэлийг бүх инженерүүдийн дунд хэлэлцүүлж гурван байрт шалгаруулна. Түрүүлсэн илтгэлийн эзнийг 5 сая, дэд байрт 3 сая, гуравдугаар байрт орсон хүнийг 1 сая төгрөгөөр шагнана. Мөн шалгарсан илтгэлийг ирэх сард зохиогдох олон улсын эрдэм шинжилгээний бага хуралд оролцуулах юм.

Тавантолгой түлш компани жил бүрийн есдүгээр сарын 15-нд галлагааны улирлыг эхлүүлж шахмал түлшээ борлуулж эхэлдэг. Үүний дагуу 2023-2024 оны галлагааны улирал өнөөдөр эхэлж Улаанбаатар хотын 7 дүүргийн хэмжээнд нийт 492 борлуулалтын цэг ажиллаж эхэллээ. Өнгөрсөн жил нийслэлд 655 борлуулалтын цэг ажилласан. Тэдгээр цэгүүдийн үйл ажиллагаанд хийсэн ажлын хэсгийн дүгнэлтээр 492 цэг сайн үнэлгээ авсан бөгөөд тэд нээлттэй сонгон шалгаруулалтад орж тэнцсэн байна. Үлдсэн 163 цэгийн борлуулагчдыг тодорхой сургалтад хамруулж мэдээлэл, арга зүйгээр хангасны дараа ирэх сарын 1-ээс үйл ажиллагааг үе шаттай эхлүүлнэ. Тавантолгой түлш компани өнөөдрийн байдлаар шахмал түлшний 118 мянган тоннын нөөцтэй байна. Шахмал түлшний түгээлтийн үйл ажиллагаа эрхлэх 31 компанийн 400 гаруй тээврийн хэрэгсэл үйлдвэр болон агуулахаас шахмал түлшийг тээвэрлэн борлуулалтын цэгүүдэд түгээж байна. Энэ жил Тавантолгой түлш компанийн Баруун үйлдвэрт 4 шугам, Төвийн үйлдвэрт 2 шугам, Зүүн үйлдвэрт 7 шугам, нийт 13 шугам ажиллана.  Хоногийн нийт үйлдвэрлэлийн хүчин чадал 2,500-3,500 тонн байна.   Улаанбаатар хотын гэр хорооллын 200 мянга гаруй айл өрхийн түлшний хэрэгцээг хангах үүргийг Тавантолгой түлш компани таван жилийн турш хариуцлагатай гүйцэтгэж ирлээ. Энэ хугацаанд шахмал түлшний технологийн горимд ямар нэгэн өөрчлөлт ороогүй, түлшний чанар муудаагүй гэдгийг хөндлөнгийн лабораторийн шинжилгээний дүн баталдаг юм. Баяжуулсан нүүрс буюу мидлингээр шахмал түлш үйлдвэрлэх нь эхний алхам буюу богино хугацааны зорилт байсан бол Тавантолгой түлш компани дараагийн алхам болох хагас коксоор шахмал түлш үйлдвэрлэх зорилтоо хэрэгжүүлэхээр ажиллаж байна. Үүний тулд хагас коксоор шахмал  түлш үйлдвэрлэж буй олон улсын чиг хандлагаас суралцаж, судалгаа, туршилтын ажлыг явуулж, технологи нэвтрүүлж, хагас коксын үйлдвэр барих хөрөнгө оруулалтыг шийдэх ажлуудыг шат дараатай хийж байна.   Шахмал түлшний борлуулалт эхэлж байгаатай холбогдуулан гэр хорооллын айл өрхүүдийг угаарын хий мэдрэгчийнхээ хэвийн үйл ажиллагааг хангахыг Хэрэглэгчдэд үйлчлэх төвөөс анхаарууллаа. Хавар, намрын улиралд тэр тусмаа бороотой өдрүүдэд монгол гэрт амьдарч байгаа айл өрхүүд зуухан дахь түлш бүрэн шатаж дуусаагүй байхад яндангаа сугалж өрхөө бүтээж угаартах эрсдэлд ордог байна. Иймд ямар ч тохиолдолд яндангаа сугалж, өрхөө бүтээхгүй байхыг анхаарууллаа.

Тавантолгой түлш ХХК жил бүрийн есдүгээр сарын 15-аас дараа жилийн тавдугаар сарын 15 хүртэл галлагааны улиралд шахмал түлшийг нийслэлд 650 гаруй гэрээт цэгээр дамжуулан худалдан борлуулдаг билээ. Шахмал түлш худалдан борлуулах гэрээт цэгийг жил бүр https://burtgel.ttt.mn/ сайтаар нээлттэй зарлаж иргэдээс ирсэн материалыг НАОБТГ-тай хамтарсан ажлын хэсэг сонгон шалгаруулдаг юм. Энэ жилийн сонгон шалгаруулалтыг дээрх хаягаар иргэдээс энэ сарын 31-ийг дуустал хүлээн авна. Ирсэн материалыг ажлын хэсгийн гишүүд шалгаж шаардлага хангасан иргэнтэй хамтран ажиллах гэрээ байгуулан ажиллах юм.

Тавантолгой түлш компани үйлвэрлэлийнхээ үйл ажиллагаанд "Хөдөлмөрийн аюулгүй байдал, эрүүл ахуйн менежментийн тогтолцоо шаардлага MNS ISO 45001:2018 стандарт"-ыг хэрэгжүүлэх төслийг өнөөдрөөс эхлүүллээ. Энэхүү стандартыг нэвтрүүлэх ажлын зөвлөхөөр "Ололт амжилт" ХХК оролцож байгаа юм. ХАБЭАБОХ-ийн дарга С.Эгиймаа хэлэхдээ, энэ сандартыг нэг санаа, нэг зорилго, нэг бодлогын хүрээнд хийж байгаа юм. Аливаа байгууллагын тулгын гурван чулууны нэг нь яах аргагүй Хөдөлмөрийн аюулгүй байдал байдаг. Стандартыг нэвтүүлнэ гэдэг дан ганц Хөдөлмөрийн аюулгүй байдал хариуцсан хэлтсийн хийдэг ажил биш. Энэ компанид байгаа 3000 ажилтан өдөр бүр гар бие оролцож байж хийдэг зүйл" гэдгийг онцоллоо. Стандарт нэвтрүүлснээр нийгэмд компанийн нэр хүнд өсч, эрүүл аюулгүй орчин бүрдэж түүнийг дагаад чадварлаг боловсон хүчин бүрдэж, санхүүгийн хувьд тогтвортой байдал бий болдог сайн талтай байдаг аж. Стандарт гэдэг ойлголтыг энгийнээр хэлбэл байгууллагын зөв дадал хэвшил юм. Энэ зөв дадал хэвшлийг нэвтрүүлэхэд нийтдээ 30 гаруй элементийг үйлдвэрлэлийн бүх шат дамжлага, байгууллагын үйл ажиллагаанд соёл болгон нутагшуулах ёстой. Үүнийг "Ололт амжилт" ХХК туслан зөвлөх байдлаар хийх юм. Тус компанийн захирал Н.Бат-Отгон хэлэхдээ, "Стандартыг зөв нэвтрүүлэхэд ажил олгогчоос манлайлал үзүүлдэг бол ажилчдаас оролцоо чухал байдаг" гэв. Тавантолгой түлш ХХК-ийн Гүйцэтгэх захирал Ц.Даваацэрэн төслийн нээлтэд оролцож, стандарт нэвтрүүлэх хамтын ажиллагаанд амжилт хүсч баяр хүргэсэн юм. Тэрээр, ажлын байранд хүн ажиллуулахдаа аваар осолгүй байна гэдэг хамгийн чухал. Тэр тусмаа үйлдвэрлэгч компанид аюулгүй ажиллагаа хамгийн чухал. Тиймээс стандарт нэвтрүүлж, түүнийг мөрдлөг, зөв соёл болгох гэж байгаа нь амжилтын гараан дээр зогсож байгаатай адил гэлээ. Ийнхүү стандарт нэвтрүүлэх ажлыг эхлүүлж, хамтын ажиллагаанд гэрээнд гарын үсэг зурлаа.  

Хагас коксоор хийсэн шахмал түлшний туршилтыг олон нийтэд танилцууллаа. Эрчим хүчний яамны Бодлогын хэрэгжилтийг зохицуулах газрын дарга Б.Насантогтох, Түлшний бодлогын хэрэгжилтийг зохицуулах газрын дарга И.Лувсанцэрэн, Тавантолгой түлш ХХК-ийн Ерөнхий инженер Ц.Алтансүх нарын албаны хүмүүс хэвлэл мэдээллийнхэнд хагас коксын түлшний талаарх мэдээллийг өглөө. Хагас коксоор шахмал түлш ажлыг судлах ажлын хэсгийг хоёрдугаар сард байгуулжээ. Ажлын хэсгийнхэн БНХАУ-ын Шанси мужийн хагас коксын шахмал түлшний үйлдвэрээр орж туршлага судалсан байна. Мөн тэндээс 80 тонн түүхий эдийг авч ирж Тавантолгой түлш ХХК-ийн тоног төхөөрөмжийг ашиглан шахмал түлш үйлдвэрлэсэн байна. Үүнийгээ магадлан итгэмжлэгдсэн лабораторит өгч шинжлүүлэн техникийн дүгнэлтүүдийг гаргасан байна. Шинжилгээгээр мидлингээр хийсэн түлшээс дэгдэмхий бодист 56 хувиар, хүхэр 40 гаруй хувиар, угаарын хий 10 гаруй хувиар, илчлэг нь илүү нь батлагдсан байна. Тэрчлэн айл өрхүүдэд өнгөрсөн дөрөвдүгээр сараас туршилтаар галлаж үзжээ. Нийтдээ 97 удаагийн механик туршилт буюу галлагааг хийж үзсэн гэдгийг албаныхан хэлж байна. Хагас коксын түлшийг туршихаас гадна гал асаагч бүтээгдэхүүнийг давхар туршсан аж. Тухайлбал, дотоодын үйлдвэрүүдийн хийж байгаа модны үртэс, өөх тосны багсармалтай бүтээгдэхүүн, хагас кокс асаагч зориулалтын цахилгаан асаагч зэргийг туршиж үзсэн байна. Ингээд хагас коксоор хийсэн шахмал түлшийг ид хүйтэн буюу ирэх арванхоёрдугаар сарын дунд үеэр нэгдүгээр сарыг дуустал улаанбаатар хотын гэр хорооллын айл өрхийн хэрэглээнд 45 хоног ашиглахаар болоод байгаа аж. Дээрх хагас коксын түлшийг хийхийн тулд БНХАУ-аас хагас коксын түүхий эдийг авч аравдугаар сараас эхлэн Тавантолгой түлш ХХК-ийн үйлдвэрт үйлдвэрлэхээр тооцоолсон гэлээ. Хэрэв дээрх 45 хоногийн хугацаанд утаа 50 хувиар багасаж үр дүнгээ өгвөл ирэх оноос Багануурын уурхайг түшиглэн хагас коксын үйлдвэр барьж хүрэн нүүрснээс кокс ялгаж авах юм байна.